Trass i internasjonalt ry, er XU lite kjent i Noreg. Det vitnar om at denne djupt hemmelege organisasjonen lukkast svært godt med å halde seg skjult. XU var nemleg den største og viktigaste norske etterretningsorganisasjonen under andre verdskrigen. Organisasjonen kartla i detalj tyske anlegg og troppar i det okkuperte Noreg og hadde fleire agentar i Hitler-Tyskland. Aktiviteten var dramatisk: falske identitetar, giftampullar til sjølvmord, celleoppbygging for å unngå at alt rakna under tortur, utvikling av kodesystem og metodar for mikrofotografering. I denne reviderte utgåva av boka som først kom ut i 1995, blir nye opplysningar som styrkar påstanden til den amerikanske historikaren Arnold Kramish lagt fram: "XU var den best organiserte og mest produktive etterretningsorganisasjonen som opererte under den andre verdskrigen."
