Gjennom fire år har fotograf Jo Straube reist på kryss og tvers av Noreg for å fotografere folkebiblioteka våre. Han har besøkt og fotografert 204 bibliotek, frå Mandal i sør til Longyearbyen i nord. Fotografen sitt ønske har vore å dokumentere dei før dei forsvinn eller gjennomgår for store endringar. Som han sjølv påpeikar – kven veit kva bibliotek vil vere i framtida? Undervegs i prosjektet kom Straube i kontakt med forfattar Frode Grytten, som sjølv er ein uttalt bibliotek-elskar. Han har bidratt med essay og skjønnlitterære tekstar i boka. NB: Boka har fransk binding, det vil seie at sidene ikkje er kutta opp. Tekstane til Frode Grytten finn du ved å løfte på arket. Omtalen er utarbeidd av BS.
